“Beritakenlah si mehuli (Perb.15:22-27) – Guna ras Tujun Tekhnologi Informasi (TI)”

Kata Perlebe.
Rikutken tema pelayanenta tahun 2020 enda, “Meningkatken kemampuan warga GBKP dalam pengelolaan informasi dan keterampilan dalam penggunaan tekhnologi informasi. Perkembangen TI tuhu-tuhu cepat ras mpengaruhi kerina dampar kegeluhenta. Ibas kita makekensa dua sisi terus itawarken man banta sisi positif ras sisi negative, tergantung sisi siapai sipergunaken. TI enda tuhu-tuhu setia guna nehi kebutuhenta rikutken menu sipindo kita, minter isajikenna. Adi bage tergantung uga kita makesa, nehken berita si la tuhu (hoaks), mpekitik kalak sideban/pemejin-mejinsa (bullying) entah meritaken Berita Si Meriah, mpegegehi kalak si kote, menshare dahin-dahin pelayanen, rst? Ibas PJJ-nta sekali enda idilo kita alu pendilo, “Beritakenlah si mehuli!”

Isi
Lukas ibas Kitab Perbahanen Rasul-rasul nulisken kerna Pedah sinisehken Tuhan Jesus ope nangkih ku Surga : Tapi ialokenndu pagi gegeh asum Kesah Si Badia she man bandu. Janah kam me pagi naksiken kerna Aku man kalak sideban, I Jerusalem, I daerah Judea ras Samaria seh ku belang-belang doni enda (Perb.1:8). Arah enda lit 2 tanggung jawab man ajar-ajar si jadi Rasul-rasul ras man kerina kalak si tek kenca Tuhan Jesus nangkih ku Surga e me “Ersaksi ras meritaken Berita Si Meriah” (bd. Amanat Agung Tuhan Jesus – Mat.28:19-20). Ibas nehi pendilo Tuhan enda labo kepe menukah sebab melala kel si mpengaruhi ajar-ajar ras kerina kalak si enggo tek pe, termasuk latar belakang kegeluhen, ras salah ngertiken Pedah Tuhan. I tengah-tengah kalak Jahudi lit pengertin maka Tuhan Jesus reh arah kalak Jahudi, emaka ise saja si atena jadi kalak Kristen arus jadi kalak Jahudi lebe. Alu pengajaren : “Labo kam terkelin ibahan Dibata adi la kin kam isunatken bagi iaturken Undang-undang Musa (15:1), terdauhen nina kalak Farisi si enggo tek, “Si labo kalak Jahudi e arus isunatken lebe, jenari ikutkenna Undang-undang Musa (15:5). Guna encakapken perbeben enda me kerina rasul-rasul ras pertua-pertua pulung I Jerusalem, perjumpan enda igelari sidang, ras enda me sidang si pemena ilakoken. Ibas sidang e dat me keputusen, gelah ula min si bahan baban si mberat man kerina perpulungen, ibas penegasen nininta nai pe labo ngasup mersansa. Tapi sebalikna, tek kita maka erkiteken lias ate Tuhan Jesus kita terkelin, bali ras si labo kalak Jahudi. Emaka ersada pe arih gelah erbahan surat-surat guna ngelayasi ukur perpulungen-perpulungen.
Oratenta enda, e me uga cara nehkensa ku perpulungen-perpulungen ras isi pengelayasi e. Ersada arih rasul-rasul, pertua-pertua ras kerina ngawan perpulungen netapken utusen si berkat ras Paulus bagepe Barnabas ku Antiokia, itetapken Silas ras Judas si igelari Barsabas, isehken surat man si labo kalak Jahudi (ay.22-23), ras ay.24-29 e me isi surat pengelayasi e, e me surat pengantar man Paulus ras Barnabas, raduken kalak enda tersena pengantar man Judas ras Silas. Khususna ay.29, e me kerna pangan pantangen, ola pan pangan si ipersembahken man dibata-dibata palsu, ola pan dareh, ola pan asuh-asuhen si mate la igeleh, janah ola erlagu la mehuli.

Pengkenaina.

  1. “Beritaken si mehuli” adi sihubungken ras tekhnologi informasi, tuhu-tuhu nambahi gegeh ras cepatna seh informasi (berita, pengelayasi) man perpulungen-perpulungen. Tapi penting sitengeti, tekhnologi informasi e sarana/alat labo tujun guna nehi tugas ras tanggung jawabta, ertina mpenahangi kita ibas dahin-dahinta.
  2. Rikutken pendilo lako jadi saksi ras si meritaken Berita Si Meriah, ibas jaman Rasul-rasul isehken arah surat ras utusen-utusen, ibas jaman tekhnologi informasi enda enggo banci meter seh arah media social (fb, wa, twitter, instragram, rst). Tapi labo berarti alat e jadi pematang, kehadirenta ibas encidahken persadanta (koinonia) tetap arus ilakoken.
  3. Ibas 2 sisi kegeluhen, terang ras gelap, positive ras negative, termasuk tekhnologi informasi endape, fifty-fifty nge si itawarken man banta. Saja uga kita makekensa, pengajuk tema enda tuhu-tuhu penting “Beritakenlah si mehuli!” sebab tekhnologi informasi enda tuhu-tuhu setia, kai si pindo e iberekenna, emaka kebutuhentalah si pindo gelah idangina kita rikutken pemindonta. Pendilo ibas dunia pendidiken gelah erlajar kita tetap (long life education), ertina si edukasi dirinta, nguda ras metua tetap erlajar, ras bijak erbahan pilihen. Ibas maba berita bagi ninta kalak Karo enda, o teman babalah berita si mehuli ibas kuta enda nari, ula berita si la mehuli. Ertina tetap njagai kiniersadan, njagai hubungen, ula sempat ceda perseninan ras perkade-kadenta, e me orat geluhta.