Minggu Passion 5 – Letare : Teridahlah
Invocatio : Genduari lakoken dingen cidahkenlah ibas tahun-tahun kegeluhen kami perbahanen si mbelin, bagi si enggo ilakokenNdu mbarenda (Hab.3:2b).
Ogen : 1 Pet.4:12-19 (tunggal).
Khotbah : Masmur 69:30-37 (antiponal).
Tema : Kuberitaken kemuliaan Tuhan.
Minggu enda e me minggu Passion si pelimaken ertina uga kita nggejapken kiniseran Tuhan Jesus ibas nebusi dosa-dosanta. Labo kap mesukah sebab ilakoken alu pengorbanen diriNa I Kayu Persilang. Bagepe Minggu enda igelari “letare ertina teridahlah” kai kin si man cidahenken? Tentuna buah kinitekenta man Tuhan. Sebab kita iselamatken/ikelini erkiteken perkuah ate Dibata (sola gratia), kita si erdosa, tapi Tuhan Yesus si jadi korban, iukum guna nebusi kita. Nina Rasul Paulus : “Sabab erdandanken lias ate Dibata nge maka kam enggo terkelin, erkiteken tek man Kristus. Labo bekas perbahanenndu, tapi pemere Dibata kap e. Labo ulih pendahinndu e, emaka labo lit dalanna ise pe muji bana (Ep.2:8-9). Erkiteken si e labo lit dalan sideban e me ngataken bujur, naksiken kerna keleng ate Dibata e man banta. Ibas kita enggo ngaloken keselamaten e, tentu labo kita ngenca ate Tuhan si ngalokenca, tapi man kerina isi doni enda. Adi bage lit dahin ibas kita e me naksiken keselamaten si enggo sialoken ras meritaken perbahanen (Kemulian) Dibata man kalak sideban gelah ia pe tek ras iselamatken (bd. tema).
Ibas 3 bagin Kata Dibata si jadi palas perenungenta, guna ngantusi tema : Kuberitaken kemulian Tuhan.
- Invocatio, Habakuk 3:2b enda pertoton Nabi Habakuk asum nggejapken metersa ia erbahan penilaian kerna Dibata, engkai maka bangsa Israel (bangsa Piihen) iukum. Uga maka bangsa si meluaten asa bangsa e si ngukumsa. Habakuk ngaloken jawaben (berita) ibas Tuhan nari, “Kalak jahat labo pulah, tapi kalak bujur la banci lang nggeluh erkiteken tetap ia ernalem man Dibata (Hab.2:4).” Enda me kemulian Dibata si tetap si enggo ipadankenNa man bangsaNa, tapi Israel megati ngelakoken si jahat, la bujur ibas ngaloken perkuah ate Dibata, tentu iukum. Ibas ngaloken berita kerna kemulian Dibata e, Habakuk ertoto gelah Tuhan encidahken mulihken perbahanen Tuhan si mbelin, bagi si enggo ilakokenNa mbarenda. Pertoton enda sekaligus mpetetap ukur kalak Israel si tading denga I Juda ras nggeluh alu benar, ernalem man Dibata.
- Ogen, 1 Petrus 4:12-19, sada perbeben engkai maka kiniseran tetap ndempar kalak si ngikutken Tuhan Jesus (Kalak Kristen). Rasul Petrus mereken pergegeh alu encidahken dua gambaren kiniseran, e me : Sipemena, kiniseran erkiteken pengkebet ibas dosa (perbahanen si jahat, munuh, nangko, encampuri urusen kalak, rsd). Sipeduaken, kiniseran erkiteken ngikutken Kristus (ngelakoken si mehuli, engkelengi, mandang si lepak) erkiteken si e segat ate kalak. Ibas kiniseran erkiteken Kristus, nina Petrus meriahah atendu, sebab arah kiniseran e kam iuji tuhu-tuhu kin kinitekenndu e entah lang (bd. Ngaya emas guna ndatken emas murni). Meriah ateta erkiteken ikut muat bagin ibas kiniseran Tuhan Jesus. Terdauhen man kalak Kristen kiniseran e jadi ulu kemalemen ate (Junani : makarios, makarioi ertina malem atendu, berbahagialah, diberkatilah kamu). Bagem nina Petrus asum kita ngenanami kiniseran gelah ula kita surut ibas kiniteken e, gelah sinanami kemulian Dibata, dingen arah e me kita erbertia (bd. tema).
- Khotbah, Masmur 69:30-37, enda pertoton Daud tupung ngenanami kesusahen ibas kegeluhenna, ibas situasi si sebo iarapna. Adi sipergermetken kiniseran si inanami Daud asum nembeh, segat ate Saul man bana. La ieteh Daud alasen engkai maka segat ate saul seh ersura-sura munuh ia. Ibas ia iayak-ayak nderkuh ia, arus lompat ke negeri kalak sideban bahken ku daerah Filisti, padahal mbaru denga ia naluken pemimpin kalak Filistin, naluken Goliat. Tapi kenca lepas enda kerina, ije igejapken Daud maka rancangen Tuhan luar biasa ibas kegeluhenna. Arah pertotonna, ipujina Tuhan, kesaksin iman, Tuhan tatap setia, erdahin guna kiniulin kalak si ernalem man baNa. Kesaksin iman, isaksikenna uga ia ngenanami kiniseran e, desken kalak si enggo gedah-gedah, gedap lau menam seh ku igung, kentisik nari pasti mate gedap lanai banci erkesah. Ibas situasi lanai ergegeh, kote, ibas pertotonna ikatakenna , “Aku enda itindih dingen ndehereng, emaka angkat min aku, jenari kelini min aku.” Inanamina situasi si lanai lit si menahangna, enggo ngeskes, lanai lit gegeh seakatan ndehereng, ibas situasi si bage nari igejapkenna Tuhan mereken serpang luah. Ngenanami kiniulin Tuhan, permasmur ngelumbaken maka kegeluhen kalak si ernalem man Tuhan, pasti ipulahi, ula aru ate,sebab ibas sitasi sikugapa pe, kalak musil tetap iperdiatekenNa, bahken kalak si ibas penjara (ctt. Ipenjaraken erkiteken ipalitken si salah man bana, ipenjaraken erkiteken la tergalarisa utangna, iaduken ras ipenjaraken labo erkiteken kesalahenna). Daud ngidah, siterpenting ersembah man Tuhan, maka Tuhan nge si mpekena-kena kegeluhen enda, selaku bangsaNa, seh ku anak kempuna. Emaka nina Daud, “Ku puji Tuhan ibas ende-enden. Kuberitaken kemulainNdu alu ngataken bujur (ay.31).”
Pengkenaina : “Kuberitaken Kemulian Tuhan”
- Ibas wari enda, tentu jadi perenungen si mbages man banta, khususna ibas kita ngalaken perbeben kerna virus corona (covid-19), perbeben kerina bangsa-bangsa ibas doni enda. Banci jadi penggejapenta seri ras kais i igejapken Nabi Habakuk kerna kiniseran bangsa Israel, bangsa pilihen Tuhan, engkai maka kalak Kristen ikut ngenanami kiniseran enda? Tangkas jawaben Tuhan ras jadi perenungen si mbages man banta kalak jahat labo pulah, tapi kalak bujur la banci lang nggeluh erkiteken ernalem man Tuhan.
- Petrus pe ngelumbaken kiniseran erkiteken ngikutken Tuhan Jesus, ngaloken kemalemen ate (Jun. makarios, kebahagiaan, diberkati). Ras permasmur ndilo gelah ersembah man Tuhan, ula surut ibas kerina situasi, bahken ibas situasi lanai iakap lit kemungkinen luah, tapi igejapkenna Tuhan labo pernah ngadi erdahin mereken keselamaten.
- Tuhu covid-19 enggo jadi pergumulen si mesangat, guna memutus penyebaren virus enda, la banci lang kerina kita idilo lako proaktif merespons petunjuk pemutusen. Hal si utama ras terutama gelah kita si jaga-jagan, alu lebe njagai dirinta, tindaken si paling aman e me “stay at home” tading I rumah, jaga kebersihen diri, jaga kebersihen rumahta, rajin cuci tan, pakai inspektan (hand saniteizer), jaga jarak, terlebih-lebih ertoto ras-ras anak jabunta, rende ras-ras, bagepe ngerenungken Kata Dibata.
Kuberitaken kemuliaan Tuhan, Tuhan mindo kita gelah engkelengi IA ras kerina manusia, tapi labo alu cara membabi buta (gagah-gagahen, sok rohani), tapi asa ukur, asa gegeh ras asa tendinta lit (segenap akal, tenaga dan sepenuh jiwa). Dage labo ninta, la perlu mbiar, Tuhan pasti nampati kita, sikap iman pribadi payo nge, tapi kita lit itengah-tengah social masyarakat, kita arus erberita arah sikap si payo, la gegabah. Labo perlu kita panic, tapi pandemic si jadi kepedulin kerinana ras pemerintahmindo kita gelah waspada ras erjaga-jaga. Raja si berpengalamen ngingetken gelah kita pentar, “Kalak pantas idahna kiniseran nilah ia, tapi kalak si la rukur iteruskenna emaka mesui atena (Kuan.22:3)” ras Tuhan Jesus pe ngataken man si iblis, asum si iblis nuruh IA lompat ibas anjung-anjung rumah pertoton, emaka reh nge kari malekat-malekatNa njagai Kam. Nina Tuhan Jesus, “Tapi lit tersurat ibas Pustaka Si Badia, ‘ola cubai Tuhan Dibatandu.’ (bd. Mat.4:5-7). Uga kita erberita, alu tetap ernalem man Dibata, Mas.23:4, ngajarken man bantam aka Tuhan mereken kita erdalan arah kelbung si gelap, tapi labo ipediatna kita erdalan si sada, ikawalina nge kita bagi permakan engkawali biri-birina alu ciken ras kayan-kayanna. Inget janji Tuhan, “Aku tetap kap ras kam seh ku kedungen jaman (Mat.28:20).”