“Dahilah Tuhan (Jes.45:22-25) – Spiritualitas”
Kata Perlebe
Spiritualitas ertina gegeh ras semangatta teridah ibas perbahanen siencidahken hubungenta ras Dibata Si Mada Kuasa. Teridah ibas sikap ras tindaken si ngelebihi akal ras pikiren manusia. Megati pe ikataken perbahanen ibas kiniteken (tindaken iman), unik tempa melawan arus, la mesunah ngalokensa/ngantusisa secara akal ras pikirenta. Ibas Padan Si Ndekah teridah arah kegeluhen Nuah, ikataken Nuah erdalan ibas dalan Dibata, tapi kerina kalak sideban tuhu-tuhu jahat ilebe-lebe Dibata, janah ijapape terjadi kejahaten (Kej.6:10-11). Abram nadingken kutana, berkat nehi pendilo Tuhan, ku negeri si ituduhken Tuhan pagi (bd.Kej.12:1). Abraham mpersembahken Isak, anak si enggo ndekah iarapkenna, erkiteken iperentahken Dibata lako mpersembahkensa (Kej.22:1-12). Uga dalanna maka banci kita encidahken spiritulitasta e me arah kita ngaloi (merespons) keleng ate Tuhan Dibata. Jesaya nehken pendilo man bangsa Israel gelah reh ndahi Tuhan, lako ngaloken keterkelinen, sebab IA ngenca Dibata la lit sideban, itengah-tengah enteremna manusia terjebak ibas pengandalen diri si teridah ibas penyembahen man gana-gana (berhala).
Isi
Perikop PJJ enda, e me perkataan (nubuat) Nabi Jesaya ibas masa pembuangen (Deutro Jesaya). Jesaya 40-66 itulis ibas tahun-tahun terakhir kegeluhenna, ije ngerana ia kerna pengarapen ras penghiburen. Ije inubuatkenna kerna kerehen Mesias si mereken keterkelinen ban bangsaNa ras kerina isi doni enda. Nabi Jesaya ngelumbaken man kalak Israel maka Tuhan lit ringan itengah-tengah bansaNa. Ras kerina pagi bangsa-bangsa alu babahna ngaku maka Tuhan Dibata Israel e me ngenca Dibata la lit sideban. Bangsa Israel idilo gelah tetap setia, anem genduari lit ibas situasi terbuang (pembuangen), tapi Israel ikelini Tuhan nge, ikataken rasalalap la masap kemenangenna. Bangsa e la pagi ipemela-melaken, rasalalap ras sindekah-ndekahna. Ate Tuhan ertenah arah bangsa pilihenNa ku kerina bangsa-bangsa.
Nina Tuhan : “Marilah pulung kerina o kam si tading ibas bangsa-bangsa. O kam kalak motu, si erbaris siarak-araken maba gana-gana kayu, kam kalak siertoto man gana-ganandu, si la ngasup ngkelini geluhndu.” Enda me pendilo Tuhan sekaligus tole mpetandaken diriNa, maka IA me Dibata si adil ras si ngkelini, sekatan IA la lit Dibata. Pendilo Dibata man kerina manusia gelah robah dingen jera ras mulih kempak Dibata guna ngaloken keterkelinen. Dibata tuhu-tuhu ertedeh ate nangdangi manusia gelah mulih kempak IA. Ikataken pe Dibata ersumpah kerna padan si enggo ipadankenNa (ay.23). Dibata ndilo manusia gelah reh ndahi IA, sebab idah Dibata maka enterem manusia motu (medungu, gampang ibodoh-bodohi). Motuna manusia teridah arah pengarapenna nangdangi kegeluhen si sea-sea, nembah man gana-gana si labo ngasup engkelini geluhna (ay.20). Dibata e me Dibata s idem kemuliaan, janah ibas paksana pagi (warina Tuhan), kerina manusia erjimpuh ilebe-lebeNa. Arah e nuduhken adi manusia tetap ibas kemotunna, si la nggit reh ku Tuhan nuduhken ia jera (bertobat), tapi kerina nge pagin manusia ngakuken maka Dibata kap Dibata si tuhu-tuhu, kalak si ngelawan mela me akapna pagin. Tapi bangsa pilihen Tuhan (kesusuren Jakup) la banci lang ndatken kemenangen erkiteken perkuah ate Tuhan.
Pengkenaina
- Dahilah Tuhan, enda pendilo man banta kerina seh ibas paksa enda pe. Engkai maka si dahi Tuhan? Erkiteken ia Dibata si adil ras ngasup engkelini kita, IA ngenca Dibata ras lalit siden. Ras kerina enda enggo igenepi Ibas Tuhan Jesus. Ibas Tuhan Jesus naksiken maka Dibatanta tuhu-tuhu erkuasa si mereken kemenangen ras kuasa, IA tetap ras setia ibas padanNa.
- Kerina kita banci reh ndahi Tuhan, ibas kerembakenta ras IA (Kristus) erbahansa kita megegeh ras ndatken semangat ibas kegeluhenta (spiritualitas) si teridah ibas perbananenta. La kita teriket ibas aru ate, sebab tek kita Tuhan tetap erdahin guna kiniulinta.
- Mari dage si dahi Tuhan, jeralah kita ibas kemotunta nari lako ngikutken Tuhan gelah si dat kepentaren nggeluh, kemenangen erkiteken perkuah ateNa.