1.Rende KEE 421 : 1 “Bas Toto Ku Endesken Geluhku }2x
Bas toto ku endesken geluhku, ku Tuhan si njayam kegeluhen
Begiken min pingko-pingkoku Tuhan, latih mberat baban kegeluhenku
2. Ertoto Ngataken Bujur man Tuhan
3. Rende KEE 360 : 1 12x
lbas Tuhan aku megegeh,Tuhan me kupujiken
Tuhan me jadi gegehku, ibas IA lit kesenangen, lbas IA lit kesenangen
4. Renungen
Nats : Efesus 1:15-23
Tema : Ertoto Guna Perpulungen
Selaku kalak sierkiniteken lit nge tanggung jawab si arus ilakokenna ibas geluhna. Tanggung jawab e labo ibas sada sampar saja ngenca, umpamana guna kinulin dirina. Tapi simbelinna tanggung jawab eme erdiate nandangi kegeluhen kalak si deban. Arus nge ia mperdiateken kalak sideban . salah sada cara si banci ilakokenna eme notoken kalak si deban. Arah pertoton siilakokenna e, subuk kalak si deban ntah pe perpulungen banci reh gegehna dingen reh paguhna erkiniteken man Dibata. Bage ka nge pengalamen kiniteken siigejapken Paulus, maka ibas geluhna pe la ia ngadi-ngadi notoken perpulungen gelahna tek nandangi Dibata.
Cara siisaksiken Paulus eme alu ngataken bujur man Dibata erkiteken kiniteken kalak si deban. Ulih kiniteken e lanai kepe terjeng rukur kerna dirina saja ngenca. Tapi arus kange rukur kerna kalak si deban. Paulus tentu ngidah maka kiniteken kalak si deban pe banci kap jadi usihen man bana. Kemajun kalak si deban pe sebage kemajun ibas kinitekenna man Dibata. La saja ngenca ibas kiniteken, ibas kekelengen pe ijadiken Paulus perpulungen e jadi usihen man jelma sienterem. E tandana maka labo ia erbana-bana bas geluhna. Gelah banci she ku bas cara erkiniteken sibagenda labo menukah. Sabab arus nge kita ngasup ngergai keberadaan kalak si deban dingen siidah pe maka kemulian Dibata pe nggeluh ibas ia. Adi bage caranta, tentu ngasup kita ngataken bujur erkiteken kiniteken temanta si deban.
Pertoton eme pengiket kiniersadan kalak si erkiniteken bas geluhna. Arah pertoton, teptep kalak sierkiniteken banci nggejapken ia ersada ras kalak si deban aminna pe pedauh-dauh inganna tading. Paulus pe nggejapken perukuren sienda ibas dirina. Igejapkenna maka pertoton nge si banci ngerakut ia ras perpulungen e. Emaka ergiah-giah kal ukurna lako notoken perpulungen e. Alu sada pengarapen maka Dibata mereken kesah kepentaren gelahna perpulungen tetap nandai Kristus ibas geluhna. Sie tujunna gelah kinulin — kiniulin siilakoken perpulungen e, banci tetap ilakokenna segeedang-gedang geluhna. Pertoton pe jadi sada dalan man manusia lako mengevaluasi dirina. Arah pertoton ia banci ngerenungken perbahanen Dibata simbelin ibasgeluhna.
Perpulungen ntah pe gereja singgeluh eme kap gereja si ertoto. Selain notoken dirinta ras keluarganta, marilah tetap sitotoken perpulungenta, gerejanta, serayan Tuhan, dahin Koinonia, Marturia bagepe Diakonia gelah gerejanta tetap megegeh ras kita pe reh ersadana persadanta ibas wari-wari si reh enda.
5. Persembahen Pengataken Bujur
- Kata Dibata kerna persembahen: “Lit kalak melumbar mere, tapi tambah-tambah kebayakenna, lit kalak degil, tapi tambah-tambah kemusilenna. Melumbarlah mere maka kam reh bayakna, sampatilah kalak maka kam pe isampati” (Kuan-kuanen 11:24-25)
- Rende : KEE 171 : 1 “Gelar Tuhan Yesus Kristus”
Gelar Tuhan Yesus Kristus lit seh si rasa lalap
Gelar Yesus maba dame, keriahen si tetap
Pemasu-masunNa lit me man krina manusia
IdiloNa kita krina ku bas kesenangen e - Pertoton Persembahen ras Syafaat, alu topik :
- Persembahen, Pemerentah Indonesia
- Moderamen GBKP, Dahin Pelayanen GBKP
- Kerina perpulungen ras serayan Tuhan ibelang-belang GBKP
- Siturah ibas perpulungen
6. Rende KEE 75 :1″Tetapkenlah Ukurta”
- Tetapkenlah ukurta ngikutken Yesus e, sigelemlah pedahNa, tutus ateta pe
Pihertendinta pe ban IA penalemen, Kesusahen I doni talu ibanNa pe
7. Pertoton Tuhan